luns, 24 de outubro de 2022

CELEBRAMOS O DÍA DA BIBLIOTECA CON ANTÓN CORTIZAS

O venres 21 conmemoramos na escola o Día das Bibliotecas cunha xornada moi especial. Visitounos o escritor Antón Cortizas e partillou con todo o alumnado da escola contos, rimas, lecturas e xogos. 

Previamente, o equipo de biblioteca preparou unha exposición, con parte da súa bibliografía, para que en todas as aulas coñeceran a súa obra.



Pero Antón ademais de escritor é investigador, publicou varios ensaios sobre o xogo e os xoguetes, que temos na escola: "Tastarasbás", "Chirlosmirlos", "O pé da laxa da Moa". Tamén fabrica xoguetes, algúns deles están no Museo do Xogo Popular do noso colexio como, por exemplo, o avión que se atopa nas escaleiras que van á biblioteca. 






Antón preparou diferentes actividades en función dos nenos e nenas. Ao alumnado de infantil leulles o conto "Os dez animais" e aprendeulles a facer unha pombiña de papel. Ao alumnado de 1º a 3º de primaria leulles "Érase unha vez na quimbamba" e despois ilustraron o seu propio exemplar facendo un minilibro. Cos maiores da escola fixo papiroflexia e tamén compartíu lectura e escritura por medio dun poema publicado "No colo das palavras".


Para agradecerlle o tempo compartido fixémoslle un agasallo: un boneco feito con folla de millo elaborado por unhas artesás da comarca, As Lolas da Cascarilla. Na dedicatoria puxemos "Antón, o xogueteiro de Esteiro", pola súa importante aportación ao noso Museo do Xogo Popular. 





Ningún comentario:

Arquivo do blog