10/03/2023

VISITAMOS A BIBLIOTECA MUNICIPAL DE NARÓN

Os nosos clubs de lectura, "Os cazadores de tesouros" e "Os cazalibros", realizaron a súa primeira actividade conxunta; e que mellor que visitar unha biblioteca próxima, neste caso á Biblioteca Pública Municipal de Narón. 

Unha vez alí explicáronnos como estaba organizada a biblioteca, a zona de novidades, a de narrativa, a de libros informativos... 

Visitamos outros lugares, como a bebeteca, espazo para os nenos e nenas máis pequenos ou a sala de reunións, como por exemplo o club de lectura para adultos. Tamén accedimos a uns corredores onde teñen os libros para retirar e descatalogados.

Tiñan preparada unha selección de libros adaptados aos nosos gustos, xa que días antes da saída cubrimos unha pequena enquisa sobre o que máis nos interesaba; así que vimos que hai libros de case todo o que nos poida interesar.

En Narón hai outros espazos onde se pode acudir a ler, xogar ou coller libros en préstamo, como a Axencia de Lectura Municipal, ubicada na Casa da Mocidade, tamén no Concello de Narón. Alí teñen moitos libros sobre manga, que é un dos temas polo que máis preguntamos. 

Convidáronnos a acudir cando queiramos xa que co carné de socio/a da Biblioteca Municipal de Ferrol, podemos coller libros en préstamo nesta biblioteca e en todas as que estean adscritas á Rede de Bibliotecas Públicas de Galicia. 

Foi unha experiencia moi interesante, grazas especialmente á encargada da biblioteca, Ainhoa, por recibirnos con tanta amabilidade na súa biblioteca. 

No seguinte enlace podedes acceder á súa páxina web, pero tamén podedes seguir o seu traballo en redes sociais, xa que son moi activas e teñen moitas propostas e actividades.

http://biblioteca.naron.es/es



Ningún comentario:

Arquivo do blog